DARYA жобасы аясындағы Жоғары деңгейдегі топтың кездесуі

2024 жылғы 4-5 желтоқсанда Ташкент қаласында Орталық Азиядағы жастардың қабілеттерін дамытуға арналған DARYA аймақтық жобасы (Диалог пен әрекет) аясында «Орталық Азияда тұрақты диалог қалыптастыру үшін әрекеттерді жоспарлау» тақырыбында жыл сайынғы Жоғары деңгейдегі топтың кездесуі өтті.

Еуропалық білім қоры мен Еуропалық Одақтың қолдауымен ұйымдастырылған іс-шараға Қазақстан, Қырғызстан, Тәжікстан, Түрікменстан және Өзбекстаннан білім және еңбек министрлерінің орынбасарлары, сондай-ақ Еуропалық Одақ өкілдері, халықаралық ұйымдар және басқа да мүдделі тараптар қатысты.

Негізгі қатысушылар қатарында – Еуропалық білім қорының директоры, Еуропалық Одақтың Орталық Азия бойынша арнайы өкілі және Өзбекстанның жоғары білім, ғылым және инновациялар министрі болды.

Қазақстаннан еңбек және халықты әлеуметтік қорғау вице-министрі Асқар Биахметов, Кәсіптік біліктілік жөніндегі ұлттық органының басшысы Ерасыл Жұманбаев, және «Talap» КЕАҚ президентінің кеңесшісі Қадырбек Бөрібеков қатысты.

Кездесу барысында DARYA жобасының негізгі жетістіктері, білім беру және кәсіби бағдарламалар арқылы тұрақтылықты нығайту перспективалары, сондай-ақ аймақтық ынтымақтастық талқыланды. Қатысушылар еңбек нарығына сай дағдыларды дамытуға, инклюзивті білім беруге және тұрақты біліктілік жүйелерін енгізуге назар аударды.

Кездесу қорытындысында, үкіметаралық диалогтың және DARYA бастамасының Орталық Азиядағы тұрақты аймақтық ынтымақтастықты қолдаудағы маңызды рөлі атап өтілді. Сондай-ақ, білім беру, кәсіби дайындық және жұмыспен қамту жүйелерінің стандарттары мен қолжетімділігін арттыруға бағытталған іс-әрекет нұсқаулығы ұсынылды.