DARYA жобасы аясындағы Қазақстан мен Еуропалық Одақтың серіктестігі

Қазақстан Республикасының Еңбек және халықты әлеуметтік қорғау бірінші вице-министрі Ақмәди Сарбасов 2024 жылдың 2 желтоқсанында Еуропалық білім беру қорының директоры Пилви Торстимен кездесу өткізді. Диалог «Орталық Азиядағы білікті жастарға арналған диалог және іс-қимыл» (DARYA) жобасы аясында ұйымдастырылды.

Кездесуде Қазақстанның Ұлттық біліктілік жүйесін (ҰБЖ) дамыту, кәсіптік біліктілік саласындағы жетістіктер және ынтымақтастықтың болашағы талқыланды.

Еуропалық білім беру қоры – Еуропалық Одақ агенттігі, ол білім беру, оқыту және еңбек нарықтарын жетілдіру бойынша қолдау көрсетеді.

Пилви Торсти Қазақстанның кәсіптік біліктілік саласындағы жоғары жетістіктерін атап өтіп, қормен ынтымақтастықты тереңдетудің жаңа мүмкіндіктерін ашатынын айтты. Қордың озық тәжірибелері Ұлттық және аймақтық деңгейде біліктілік жүйелерін жетілдіру үшін қолданылатын болады.

Кездесу қорытындысы бойынша тараптар кәсіптік дағдыларды дамыту және тәжірибе алмасу бағытындағы жұмыстарды белгіледі. Бұл бастамалар Мемлекет басшысының 2025 жылды «Жұмысшы кәсіптер жылы» деп жариялау жөніндегі тапсырмасын іске асыруға ықпал ететін болады.