«ASTANA POLYTECHNIC» Жоғары колледжінде «IT – болашақтың стратегиялық ресурсы» тақырыбында форсайт-сессия
2025 жылғы 11 маусымда «ASTANA POLYTECHNIC» Жоғары колледжінде «IT – болашақтың стратегиялық ресурсы» тақырыбында форсайт-сессия өтті. Шараға цифрлық экономиканы дамыту және білікті кадрларды даярлау мәселелеріне жауапты білім беру ұйымдарының, бизнес өкілдерінің және мемлекеттік құрылымдардың өкілдері қатысты.
Іс-шараның ашылуына Астана қаласы әкімдігі, педагогтер қауымдастығы мен мәслихат депутаттары қатысты. Астана қаласы мәслихатының VIII шақырылымындағы депутаты Бауржан Тілеубергенұлы Қасымбергебаев құттықтау сөз сөйлеп, жастардың цифрлық сауаттылығын арттырудың және колледждер мен жұмыс берушілер арасындағы байланысты нығайтудың маңыздылығын атап өтті.
Сессия барысында Еңбек ресурстарын дамыту орталығы акционерлік қоғамының салалық біліктілік жүйелерін үйлестіру департаментінің директоры Ернат Ғапуұлы Жүнісов баяндама жасап, жасанды интеллект пен автоматтандыру секілді технологиялардың қарқынды дамуы мамандар даярлауға деген көзқарасты қайта қарауды қажет ететінін атап өтті. Оның айтуынша, болашақ — жылдам үйреніп, бейімделе алатын әрі жаңаны жасай алатын адамдарға тиесілі.
Е. Жүнісов біліктілік талаптарынан бастап құзыреттерді мойындауға дейінгі жүйелі тәсілдің маңызын ерекше атап өтті. Ол IT және телекоммуникация салаларында салалық біліктілік шеңберлерін енгізу, 55 кәсіптік стандартты әзірлеу, сондай-ақ Ұлттық қызметтер жіктеуішке AR/VR-дизайнер, блокчейн-архитектор, нейрожелі жобалаушы сияқты 40-тан астам жаңа мамандықты қосу жөнінде баяндады. Сонымен қатар, ол Цифрлық дағдылар банкін іске қосу, микробіліктіліктерді енгізу және біліктілікті тану орталықтарының желісін дамыту еңбек нарығына икемді бейімделу құралы ретінде аса маңызды екенін атап өтті.
Колледж студенттері web-әзірлеу, мобильді қосымшалар және автоматтандыру бағыттары бойынша өз жобаларын таныстырып, цифрлық экономиканың талаптарына сай тәжірибелік дағдыларын көрсетті.
Шара соңында «IT-білім беру және еңбек нарығы» тақырыбында панельдік пікірталас өтіп, қатысушылар арасында ынтымақтастық туралы меморандумдарға қол қойылды.